खोलाको दुई तर्फका पिल्लर निर्माण गर्दा ८८ लाख रुपियाँ सकेर हिसाव किताव लुकाउने मुख्य ब्यक्ति उपभोक्ता समितिका सचिब शङ्कर बजगाई भएको खुलेको छ । मोरङको मिक्लाजुङ–५ को सोल्टी खोलाको पुल निर्माण गर्ने उपभोक्ता समितिमा बजगाई सचिव थिए । सचिव बजगाईलाई आर्थिक हिनामिना गर्न सम्पूण कागजात मिलाउन गाउँपालिकाका तत्कालिन इन्जिनीयर सुवास आचार्यको सहयोग रहेको खुलेको छ । आचार्य त्यो बेला गाउँपालिकामा करार सेवामा कार्यरत थिए । हाल उनी लेटाङ नगरपालिकामा कार्यरत छन् । सोल्टी खोलाको आरसीसी पुल निर्माणका क्रममा लाखौं रुपियाँ हिनामिना भएपछि हाल पूल निर्माणको काम रोकिएको छ । उत्तर–पूर्वी मोरङको मिक्लाजुङ–५ को धानखेतीसँग गुप्ती र खोलीटारलाई जोड्ने सोल्टी खोलामा पुल नबन्दा त्यस क्षेत्रका मानिस वर्षौं देखि सास्ती खेप्न बाध्यछन् ।
स्थानीयलाई मात्र होइन , उपभोक्ता समितिका अध्यक्ष बुद्धिमान श्रेष्ठलाई समेत गुमराहमा पारेर बजगाईले इन्जिनीयरसँग सेटिङमा लाखौं कुम्ल्याएको स्थानीयको बुझाई छ । तर, गाउँमा पुल बन्ने आशामा स्थानीय भने चुपचाप बसेको बुझिएको छ । समाचार स्रोतले भन्यो –करारका इन्जिनीयरको सेवा अवधि सकिन लागेको मौका पारेर बजगाईले पुलको लम्बाई ७० फिट बनाउन दबाब दिएका थिए । इन्जिनीयर आचार्यले समेत बजगाईका नोटमा लोभिएर सोही अनुसार इष्टमेट गरेको गाउँपालिका स्रोतको भनाई छ । गाउँपालिकाले ६० लाखमा पुल बनाउँने योजना तय गरेको थियो । तर, बजगाईले प्रदेश सभाका सांसद कुलप्रसाद साम्वा मार्फत बजेट ल्याउने भन्दै १ करोड १० लाखको लागत इष्टमेट गराएका थिए । बजगाईको उसबेलाको चुरिफुरीका कारण गाउँपालिका अध्यक्ष देवीप्रसाद आचार्य र वडाध्यक्ष रुद्र लिङ्देन समेत ब्याक भएका थिए । वर्षायाममा खोला तर्दा सोल्टी खोलाले धेरै मानिसलाई बगाइसकेको थियो । त्यसैले बजगाईले बजेट ल्याउने भनेपछि स्थानीय उपभोक्ता मात्र होइन, गाउँपालिकामा पदाधिकारी समेत मौन बसेका थिए । प्रदेश सरकार गठन भएको वर्ष दिन नबित्दै तत्कालिन आर्थिक मामिला तथा योजना मन्त्री इन्द्रबहादुर आङ्बोले पुलको शिलान्यास गरेका थिए ।
स्थानीय तीन वटा सामूदायिक वन र गाउँपालिकाको साझेदारीमा निर्माण गर्ने तय भएको पुलका लागि प्रदेश सरकारले ५० लाख रुपियाँ थपिदिने भएपछि बजगाई र सांसद साम्वासँग सबै खुसी भएका थिए । तर, १ करोड १० लाख रुपियाँको आयोजना निर्माण गर्दा गाउँपालिका टेण्डर आह्वान गरेन । सामान्यतया ५० लाख रुपियाँ माथिका आयोजना निर्माण गर्दा इविडिङ गर्ने सरकारी नियम छ । कार्यपालिकाको सामान्य निर्णयबाट मिक्लाजुङ गाउँपालिकाले रकम निकासा गरीदियो । उता तत्कालिन आर्थिक मामिला तथा योजना मन्त्री इन्द्र आङ्वोको ठाडो निर्देशनमा प्रदेश सरकारले उपभोक्ता समितिको नाममा चेक दियो । गाउँपालिकामा मार्फत भूक्तानी हुने उक्त रकम उपाध्यक्ष सरला राईले समेत अनुगमन गर्न भ्याइनन् । अधिकांश जनप्रतिनिधिहरू उक्त पुल निर्माणका बिषयमा बेखबर जस्तै छन् ।
सरकारी कोषको ८८ लाख रुपियाँ सकिए पनि पुल निर्माणका क्रममा ल्याइएका कतिपय सामग्रीको पैसा अझै भुक्तानी भएको छैन् । सरकारी पैसा आउनु अगावै बजगाईले वरडाँडा सामूदायिक वनबाट १० लाख रुपियाँ,गौमति सामूदायिक वनबाट १० लाख र धानखेती सामूदायिक वनबाट ५ लाख रुपियाँ छिनी सकेका थिए । शिलान्यासको बेला स्थानीय टेकबहादुर राईलाई उपभोक्ता समितिको अध्यक्ष बनाइएको थियो । टेकबहादुरले २ महिना पनि जिम्मेवारी सम्हाल्न नसकेपछि बुद्धिमान श्रेष्ठको अध्यक्षतामा अर्को उपभोक्ता समिति बनेको हो । सोही समितिमा शंकर बजगाई सचिव बने अनि सेटिङ मिलाउँदै रकम कुम्ल्याउन थाले । उपभोक्ता समितिका अध्यक्ष बुद्धिमान श्रेष्ठले भने –सचिवले खोलाको दुई तर्फ पिल्लर लगाउँदा मात्र ८८ लाख रुपियाँ खर्च भयो भने ,होला त नि भनेर मैले पनि सही गरिदिएँ । सचिवले जे जे भन्छन् सोही अनुसार मान्दै काम गरेको बुद्धिमानको भनाई छ । अध्यक्ष श्रेष्ठका अनुसार धेरै कुरा सचिवलाई थाहा छ ।
अहिले पुल बनि नसक्दै बजेट सकिएको छ । साडे ३ वर्षमा न पुल बनेको छ । न हिसाव सार्वजनिक भएको छ । हिसाव सार्वजनिक नै नगरी बजगाईले नै हतार हतार भीमप्रसाद गौतमको अध्यक्षतामा अर्को समिति बनाएका छन् । गौतमले अघिल्लो समितिको हिसाव माग गर्दा न त गाउँपालिकाले हिसाव दिएको छ न प्रदेश सरकारले ।
को हुन बजगाई ?
शङ्कर बजगाई एमाओवादी केन्द्रका स्थानीय नेता हुन् । गत स्थानीय निर्वाचनमा माओवादी केन्द्रबाट वडाध्यक्षको उम्मेद्वार बनेका बजगाई कांग्रेसका रुद्र लिङ्देनसँग चुनाब हारेका थिए । चुनाब हारे पनि नेकपा एमाले र माओवादी केन्द्रको एकता पछि उनको चुरिफुरी निक्कै बढको थियो । प्रदेश सभा सदस्य कुलप्रसाद साम्वाको सोर्समा योजना नै नबनाई बजेट ल्याउने र आफै उपभोक्ता समितिमा बसेर रजगज गर्ने उनको मुख्य काम हो । उनी वडा नं ५ का अधिकांश योजनाका हर्ताकर्ता हुने गरेका छन् । स्थानीयका अनुसार बजगाईले केही प्रतिशत रकम प्रदेश सभा सदस्य एवं आफ्ना गुरु साम्वालाई समेत पुर्याउने गरेका छन् । तर, नेकपा एमाले र माओवादी केन्द्र फुटेपछि बजगाई नेकपा एमाले तिर लागेका छन् । धेरै वटा उपभोक्ता समितिमा बसेर काम गरेका बजगाईको आर्थिक हैषियत दिन दुगुना रात चौगुना परिवर्तन भएको छ । स्थानीय समाचार स्रोत भन्छ –अहिले उनले ट्रिफर, गाडी घोडा जोडिसकेका छन् । कुनै ब्यापार नगरी एकै पटक यति धेरै सम्पत्ति कसरी जोडे भन्ने विषयमा स्थानीय भन्छन् – हामीलाई कसरी थाहा हुनु र ? तर, उनको समाजिक हैषियत भने बदलिएको छ ।
सम्पत्ति सुद्धिकरण र अख्तियारमा जाने
खेल मैदान निर्माणमा होस या पुल निर्माण । सडक निर्माण होस या कल्भर्ट जता पनि आर्थिक अनियमिततामा जोडिएका बजगाईको सम्पत्ति छानविनका लागि सम्पत्ति सुद्धिकरण विभागमा उजुरी गर्ने स्थानीयले बताए । नाम उल्लेख नगर्ने सर्तमा एक जना स्थानीयले भने उनका कारण हाम्रो बदनाम भयो । पुलमा भ्रष्टाचार गरेर पैसा कुम्ल्याए ।
साभार : Breaknlimks .com
