एन्फाका बरिष्ठ उपाध्यक्ष पंकज विक्रम नेम्बाङ्ग विवादमा मुछिएसंगै एउटा अर्को घटना चर्चामा रहेको छ । सन २०१९ मा ए एफ सी च्याम्पियनसिप छनोटको लागि अण्डर सिक्स्टिनको टिमबाट १४ वर्षीय गोलकिपर रोशन नेपाललाई हटाएर पंकज नेम्बाङ्गले आफ्ना छोरालाई टिममा समावेश गरेको भन्ने कुरा अहिले चर्चामा आएको छ। आश्विन ६, २०७६ मा खेलपाटि डट कमले ‘योग्य’ फालियो, उपाध्यक्षको ‘छोरा’ घुसाईयो शिर्षकको समाचार प्रकाशन गरेको थियो । त्यस अनुसार यू–१६ राष्ट्रिय फुटबल टिमको खेलाडी छनोटमा ‘योग्य’ खेलाडीलाई बाहिर राख्दै अखिल नेपाल फुटबल संघ (एन्फा)का पदाधिकारीका छोरालाई राष्ट्रिय टिममा समावेश गरिएको खुल्न आएको जनाइएको छ। एएफसी च्याम्पियनसिप छनोट खेल्न जोर्डन पुगेको नेपाली टिममा पहिलो रोजाईमा खेल्दै आएको गोलकिपर रोशन नेपाललाई बाहिर राख्दै वरिष्ठ उपाध्यक्ष पंकज बिक्रम नेम्वाङको छोरालाई टिममा राखिएको खुल्न आएको कुरा त्यहा लेखिएको छ । त्यति बेला यू–१६ राष्ट्रिय टिमको प्रतिनिधित्व गर्दै जोर्डन उडेका पथ्युङहाङ नेम्वाङ वरिष्ठ उपाध्यक्ष पंकज विक्रमका छोरा थिए ।
यू–१६ राष्ट्रिय टिममा नअटाइएका रोशन नेपाल नेपालका फुटबल फ्यानले रुचाएका उत्कृष्ट गोलकिपर मध्ये एक हुन। रोशनले सो भन्दा अघिल्लो संकरणको साफ यू–१५ च्याम्पियनसिपमा नेपालको प्रतिनिधित्व गरेका थिए । एन्फा एकेडेमीका उत्पादन समेत रहेका रोशन विभिन्न उमेर समूहमा पहिलो रोजाईको गोलकिपरको रुपमा रहदै आएका थिए । एन्फामा राजनैतिक खेल भएको कारण सक्षम खेलाडिहरु खेल्न नपाएको भन्ने गुनासाहरु सामाजिक संजालमा यतिबेला आइरहेका छन। कलोपर्दा टिमका सविन घिमिरेले यस विषयमा बुझ्नको लागि रोशन नेपालसंग छोटो कुराकानी गरेका छन।
उक्त संवादमा रोशनले आफु त्यसबेला अण्डर १६ खेल्न योग्य खेलाडि भएको जिकिर गरेका छन । १३ वर्षको उमेरमै एन्फा एकेडेमीमा रहदा गोलकिपरको रुपमा सबैको रोजाइमा पर्ने पहिलो खेलाडि उनी नै थिए भनेर रोशन सुनाउछन। त्यसका साथै उनी सबैभन्दा मेहनती खेलाडि पनि थिए । उनी थप सुनाउछन , ” तालिमको क्रममा जब म खेलमा गल्ति गर्दथे ,त्यसबेला म बिहान ४ बजेरै उठेर तालिम गर्दथे । ” उनी त्यो चिसो रातमा मोबाइलको लाइट लिएर तालिम गरेको कुराले अझै झस्किन्छ।
त्यसबेला यु १६ मा किन छनौट हुनु भएन भन्ने प्रश्नमा उनले जवाफ दिए , ” म भन्दा धेरै तपाइलाई थाहा छ हाम्रो देशको अवस्था । हामी किन पछाडी छौ भन्ने उत्तार शायद हामी सबैलाई थाहा छ। ”
नेपाली फुटबललाई राजनीति प्रवेशले खराब पारेको छ ?भन्ने प्रश्नमा उनको उत्तर छोटो थियो , ” यस अफ कोर्स । “
उनको भविष्यको योजना सुनाउदै भने , ” मेरो जिवन नै फुटबल भएको कारण भविष्य पनि फुटबल नै हो । म हिजो भन्दा उत्कृष्ट खेल्न चाहन्छु र यसको लागि म कडा परिश्रम गरिरहेको छु । म देशको नामलाई आकाशभन्दा माथि उठाउन चाहन्छु। ”
अन्त्यमा फुटबल प्रेमीहरुको लागि के भन्न चाहनुहुन्छ भन्ने प्रश्नमा उनले अनुरोध गरे , ” जसले देशको लागि कडा परिश्रम गर्छ , उनीहरुले खेल्न पाउन पर्छ। उनीहरुलाई सम्पूर्ण देशले नै सम्मान गर्नु पर्छ । मलाई तपाइहरुको साथ र सहयोगको खाचो जहिले पर्नेछ । व्यवसायिक फुटबल खेलाडि हुनको लागि म जस्तो निम्न आर्थिक अवस्था भएकोलाई गाह्रो छ तर पनि मैले हिम्मत हारेको छैन। एकदिन म देशको नाम उच्च राख्नेछु । ”
