एजेन्सी – युरोकप २०२० का रोमाञ्चक घटनाहरु मध्ये सबैभन्दा लोकप्रिय रह्यो रोनाल्डो र उनले हटाएका कोका-कोलाका बोतल। पोर्चुगलको सुरुवाती खेलपूर्वको प्रेस सम्मेलनमा रोनाल्डोले आफ्नो अगाडि राखिएका दुईटा कोका-कोलाका बोतल हटाउँदै पानीको बोतललाई सङ्केत गर्दे “अगुवा अगुवा ” (पानी) भनेका थिए। यस लग्तै विश्वभरिका धेरै मिडियाले यस घटनालाई जोडेर कोका-कोलाको शेयर मूल्यमा ४ अर्ब अमेरिकि डलरले गिरावट भएको भन्ने समाचार सम्पादन गरे। तथापी कोका-कोलाको शेयर मूल्य घटनु पछाडिको वास्तविकता अर्कै थियो।
११ जुन, २०२१, शुक्रबारको अन्त्यमा न्यूयोर्क स्टक एक्सचेन्जमा कोका-कोलोको प्रति कित्ता शेयरको मूल्य थियो ५६.१६ अमेरिकी डलर। शनिबार र आइतबार बन्द रहेको स्टक मार्केट १४ जुन, २०२१ सोमबार खुल्दाको समयमानै न्यूयोर्क स्टक एक्सचेन्जमा व्यापार हुने शेयरहरुमा गिरावट आएको थियो जस मध्ये कोका-कोला पनि एक थियो। पछिलो समय ५६.१६ अमेरिकी डलर प्रति कित्ता व्यापार भएको शेयर रोनालडोले बोतल हटाउनु ठिक ३ मिनेट अगाडी ५५.२६ अमेरिकी डलर प्रति कित्तामा व्यापार भएको थियो जुन प्रति कित्ता शेयर मूल्यमा १.६% ले गिरावट हो। कूल ४.३ अर्ब कित्ता शेयर न्यूयोर्क स्टक एक्सचेन्जमा जारी भएका कारण प्रति कित्तामा १.६ प्रतिशतले गिरावट हुँदा कोका-कोलालाई रोनाल्डोले बोतल हटाउनु भन्दा ठिक ३ मिनेट अगाडीनै करिब ४ अर्ब अमेरिकी डलरको झट्का लागिसकेको थियो। अर्को रोमाञ्चक कुरा रोनाल्डोले कोकको बोतल हटाउँदै सङ्केत गरेका पानीका बोतल पनि कोका-कोला कम्पनिकै उत्पादन भित्र पर्दछ।
