झापा — झापाको बिर्तामोडस्थित रहेको एक होटलमा खाजा खान बसेका व्यक्तिहरुकोको भिडियो खिचेर युट्युब लगायतका सामाजिक सञ्जालमा सार्वजनिक गर्ने ३ जनालाई प्रहरीले शुक्रबार पक्राउ गरेको छ । चरित्र हत्या गरेको भन्दै पीडितले युट्युबरविरुद्ध प्रहरीमा उजुरी परेपछि उनीहरु पक्राउ परेका हुन् ।
पीडितले बिर्तामोडको होटल जंगल भ्यु चारआलीका सञ्चालक हेमराज भट्टराई, सोही ठाउँका स्नुकर पूल सञ्चालक सुवास कार्की, युट्युबरहरु खगेन्द्र घिमिरे र भाष्कर श्रेष्ठ तथा सामाजिक सञ्जालमा भिडियो अपलोड गर्ने कल्पना थापा बस्नेत र चन्दा प्रसाईं पोखरेल गरी ६ जना विरुद्ध इलाका प्रहरी कार्यालय अनारमनीमा उजुरी दर्ता गराएका थिए ।
प्रहरीले जिल्ला प्रशासन कार्यालय झापाबाट पक्राउ अनुमति लिएर हेमराज भट्टराई, सुवास कार्की र युट्युबर खगेन्द्र घिमिरेलाई पक्राउ गरेको छ ।
मंगलबार राति बिर्तामोडको सिमाना होटलको कोठाभित्र बसेर खाजा खाइरहेका दुई महिला र एक पुरुषको भिडियो खिचेर सार्वजनिक गरिएको थियो । होटलमा प्रहरीले युट्युबर लाई साथमा लिएर छड्के हानेको थियो । प्रहरी त्यहा पुग्दा २ महिलाहरु एउटा कोठामा र अर्का एक पुरुष अर्कै कोठामा भेटिएका थिए। उनीहरुलाई अनैतिक व्यवहार गर्दै भिडियो खिचिएको थियो।
