३३ बर्षदेखि बेपत्ता व्यक्तिको उद्दार पश्चात पारिवारिक पुनर्मिलन

कैलाली- कैलाली जिल्ला जानकी गाउपालिका वडा नं. ७ टिकलीगढ घर भएका ६२ वर्षीय लोकुन डगौरा थारुको उद्धार पश्चात पारिवारिक पुनर्मिलन भएको छ । थारु बिगत ३३ बर्ष अघि कामको सिलसिलामा भारतको सिम्ला गएदेखि वेपत्ता अवस्थामा थिए । यसै जानकारी प्राप्त भए पश्चात खोजिको क्रममा थारु भारतको विहारमा फेला परेको र उनले आफ्नो ठेगाना कैलाली जिल्ला रहेको बुझिएको थियो । तत्काल भारतीय पक्षसंग समन्वय गरी उद्दार गर्नको लागि कैलाली जिल्लाका जिल्ला प्रहरी प्रमुख विश्व अधिकारीले थारुलाई फेला पार्ने भारत विहार राज्य गया जिल्ला बाराचट्टी बस्ने सन्दिप यादव मार्फत थारुसंग सम्पर्क स्थापित गरेका थिए ।
लोकन डगौरा थारु सबै कुरा स्मरण गर्न र अभिव्यक्त गर्न सक्ने अवस्थामा नरहेता पनि उनीसंग भिडियो च्याट मा कुराकानी गर्दा आफ्नो घर टिकापुरको मुनुवा आसपास हो भन्ने बताएपछि उनको फोटो सहित उक्त गाऊँघरमा घर तथा आफन्तजन पत्ता लगाउन ईलाका प्रहरी कार्यालयबाट  प्रहरी परिचालन गरिएको थियो ।
थारुलाई २५ अगस्ट (भाद्र ९ गते) बेलुकी करीब ६ बजे संदिप यादवले गया स्थित नेशनल हाईवेमा फेला पारेपछि आफ्नो घरमा ल्याई सोधखोज गरी नेपालमा सम्पर्क गरेका थिए। तर थारु १० गते बिहान त्यहाँबाट निस्की हिडेकोमा सन्दिप यादवले पुन खोजतलास गरी आफ्नो घरमा राखेका थिए ।
जिल्ला प्रहरी कार्यालय कैलालीले थारुको घर ठेगाना र आफन्तको एकिन गरेपछि भारतीय प्रहरी र संदिप यादवको सहयोगमा जिल्ला प्रहरी कार्यालय, पर्सामा ल्याइएको थियो। जि.प्र.का. पर्सामा उनका छोरा तथा प्रहरीलाई पठाई थारुलाई जी प्रा का कैलाली ल्याई उनका छोरा राम बहादुर डगौरालाई बुझाइ पारिवारिक पुनर्मिलन गरिएको छ ।