काठमाण्डौ – सैनिक विशेष अदालतले सर्ट मेसिन गन (एसएमजी) चोरीको झुठो अभियोगमा साढे दुई वर्षदेखि जेल सजाय काटिरहेका सैनिक अमल्दार लबकुमार गुरुङ र सिपाही सरोज तामाङ निर्दोष ठहर गर्दै तत्काल रिहा गर्न आदेश दिएको छ। सैनिक विशेष अदालतको पाटन उच्च अदालतका न्यायाधीश सैनिक विशेष अदालतका अध्यक्ष लोहितचन्द्र शाह, नेपाली सेनाका कानुन विभाग प्रमुख उपरथी रत्नप्रकाश थापा र रक्षासचिव बेगेन्द्रराज शर्माको बिहीबार बसेको संयुक्त इजलासले सो आदेश दिएको हो । सैनिक विशेष अदालतको आदेश अनुसारको पत्र चितवन जिल्ला कारागारमा पठाउने तयारी भइरहेको जानकारी आएको छ । मुख्यालयबाट पठाइएको पत्र प्राप्त भएपछि चितवन कारागारले उनीहरूलाई रिहा गर्ने जनाइएको छ ।
बिहीबार भएको फैसला शुक्रबार सुनाइएको हो । सैनिकद्वयबाट हतियार चोरीको आरोपमा कसुर नपुग्ने भन्दै गरिएको फैसलामा उनीहरूले हतियारको सुरक्षा गर्न नसकेकोसमेत ठहर गरिएको छ। उक्त आरोपमा उनीहरूलाई तीन वर्ष बढुवा रोक्का गर्ने समेत आदेश दिइएको छ। सेनाले यसअघि सैनिक समरीले गरेको फैसला पनि गलत थिएन भन्ने देखाउनका लागि उनीहरूलाई पनि गनको सुरक्षा गर्न नसकेको भन्दै दोषी ठहर भएको हुन सक्ने पीडितका परिवारले शंका व्यक्त गरेका छन्।
लबकुमार र सरोजले चोरेको भनिएको बडी नम्बर केआर १००७९२ र बट नम्बर (ख) २५ को एसएमजी साउन ७ गते चितवनमा भएको सैनिक भरत गुरुङको हत्यामा संलग्न सिपाही गंगाधर ढकालको साथबाट बरामद भएपछि साढे दुई वर्षदेखि जेलमा रहेका सैनिकद्वय गुरुङ र तामाङ निर्दोष ठहर भएका हुन्। उनीहरूलाई अनाहकमा फसाइएको घटनाबारे नेपाल समयका पत्रकार अनिल यादवद्वारा खोज गरिएको ‘गन’ले अन्याय, ‘गन’ले न्याय सिरिजमा निरन्तर समाचार प्रकाशन गर्दै आएपछि सैनिक मुख्यालयले यो विषय टुंग्याउन चासो देखाएको थियो।
झुठो अभियोगमा दुई सैनिकले जेल सजाय भोगिरहेकोबारे नेपाल समयले शृंखलाबद्ध रूपमा समाचार प्रकाशन गरेपछि सैनिक मुख्यालयले हतियार प्रकारणबारे अनुसन्धानका गर्न एक छानबिन टोली चितवन पठाएको थियो। छानबिन टोलीको प्रतिवेदनले पनि लबकुमार–सरोजलाई निर्दोष देखाउँदै गंगाधरलाई नै दोषी देखाएको थियो।
सिपाही गंगाधर ढकाललाई नेपाली सेनाको समरी जनरल सैनिक अदालतले जन्मकैद गर्ने फैसला गरि सकेको छ । उनलाई सैनिक गणबाट हतियार चोरी गरेको पनि अभियोग लगाइएको छ ।
(समाचार स्रोत : नेपाल समय )
