तुइन प्रकरणमै चुईक्क नबोलेको सरकारले हेलिकप्टर प्रकरणलाई कसरी लिने हो?

विराटनगर – दार्चुला सदरमुकाम खलंगाको बस्तीसहित नेपाली सेनाको ब्यारेकमाथि भारतले अनधिकृत रूपमा निरन्तर हेलिकोप्टर उडाएको विषयमा सर्वत्र आलोचना भएको छ । यस विषयमा भारतसँग कूटनीतिक जवाफ माग्न गृह मन्त्रालय र नेपाली सेनाले परराष्ट्र मन्त्रालयको ध्यानाकर्षण गराएका छन् ।
गुरु गोरख गुल्म हेडक्वार्टरमाथि भारतीय हेलिकोप्टर पटक–पटक उडाइएकामा नेपाली सेनाले गम्भीर सरोकार राखेको संगै यस विषयमा सेनाका उच्च अधिकारीहरूले शुक्रबार जंगीअड्डामा छलफल गरेका थिए । उनीहरुले रक्षा मन्त्रालयमार्फत परराष्ट्रलाई जानकारी गराउने निष्कर्ष निकालेका थिए ।
गृह मन्त्रालयले भारतसँग जवाफ माग्न परराष्ट्र मन्त्रालयलाई शुक्रबार पत्र पठाएको छ  । भारतीय हेलिकप्टर नेपाली आकाशमा विना अनुमति उडेको विषय असाधारण हो ।यस विषयमा भारत सरकारसँग असन्तुष्टि जनाउन र त्यस विषयमा संलग्नलाई कारबाही गराउने कूटनीतिक पहलका लागि परराष्ट्र मन्त्रालयलाई पत्र पठाइएको जनाइएको छ।
भारतीय हेलिकोप्टर केही दिनयता दार्चुलाको नेपाली आकाशमा निरन्तर उडेको विषयमा शुक्रबार कान्तिपुरमा समाचार प्रकाशित भएको थियो । यस पश्चात सम्पूर्ण नेपालीले यसको विरोध गरेका छन्।
गत साउन १५ मा भारतीय सीमा सुरक्षा बल (एसएसबी) ले तुनइको तार काटिदिँदा दार्चुलाको ब्याँस गाउँपालिका– २ का जयसिंह धामी महाकाली नदीमा बेपत्ता भएका थिए। महाकालीमा बेपत्ता भएका जयसिंह धामीको खोजबिनका लागि गृह मन्त्रालयको टोलीले महाकाली नदीको पल्लो किनारमा पनि ड्रोन उडाउन खोज्दा भारतले असहयोग गरेको थियो । यता भने खुल्लम खुल्ला विना अनुमति भारतले हेलिकप्टर उडाइ रहेको छ । तुइन प्रकरणमै चुईक्क नबोलेको सरकारले हेलिकप्टर प्रकरणलाई कसरी लिने हो भन्नेमा सबैको जिज्ञासा रहेको छ र चिन्ता पनि उत्तिकै ।