संखुवासभा – सङ्खुवासभाको मादी नगरपालिका वार्ड नम्बर १ खोला गाउँमा भएको हत्या प्रकरणको अनुसन्धानका लागि नेपाल प्रहरीको केन्द्रीय अनुसन्धान ब्युरो (सिआइबी) को टोली पनि खटिने भएको छ ।
घटनाको अनुसन्धानका लागि सिआइबीको पिलर वान का डिएसपी रुकम बहादुर कुँवरको नेतृत्वमा ५ जनाको टोली घटनास्थल तर्फ हिँडेको प्रदेश १ प्रहरी प्रमुख डिआइजी अरुणकुमार बिसीले बताएका छन् । सिआइबीको टोलि मंगलबार नै विराटनगर विमानस्थल हुदै सङ्खुवासभा लागेको छ।
सोमबार विहान मादि नगरपालिका १ स्थित उमलिङमा ५२ वर्षका तेजबहादुर कार्की, उनका आमा ८४ वर्षीया पार्वती कार्की,श्रीमती ५२ वर्षीया कमला कार्की, बुहारी ३२ वर्षीया रञ्जना कार्की, नाति वर्ष ८ का विपिन कार्की र नातिनी वर्ष ५ की गोमा कार्की आफ्नै घरको वरपर विभिन्न स्थानमा विभिन्न अवस्थामा मृत फेला परेको थाहा पाए पछि स्थानीयले प्रहरीलाई खबर गरेका थिए ।
प्रहरीको अनुसन्धान टोली संखुवासभाको उमलिङमा खटिएको छ भने अनुसन्धानमा तालिमप्राप्त कुकुरहरुको समेत प्रयोग गरिएको छ ।
