विराटनगर – यदि तपाईलाई कसैले रोजगारको लागि अहिले नै मलेसिया पठाइदिन्छु भनेको छ भने तपाइँ ठगिन सक्नुहुनेछ । मलेसियाका मानव संशाधनमन्त्री दातुक सेरि एम सरभाननले मानव संसाधन मन्त्रालयमा दर्ता भएका निजी रोजगार एजेन्सीहरुलाई हालका लागि कुनैपनी आप्रवासी श्रमिक तथा घरेलु कामदारका लागि मलेसियामा रोजगारीको निम्ति विज्ञापन नगर्न निर्देशन गरेका छन् । उनले केहि दिन अगाडि रोजगारदाताहरुलाई उद्रित गर्दै कोरोना भाइरस (कोभिड-१९) को माहामारी सुरुभएदेखि विदेशी कामदारहरुको निम्ति यहि वर्षको डिसेम्बर ३१ सम्म मलेसिया प्रवेश पुर्ण रुपमा बन्द रहेको जानकारी दिदै वैदेशिक रोजगारीका लागि मलेसिया आउन चाहने आप्रवासी श्रमिकलाई भ्रममा नपार्न आग्रह गरेका छन् । मलेसिया सरकारले नेपाल सहित पाँच देशमाथि लगाएको प्रतिबन्ध हटाएपनी वैदेशिक रोजगारीमा आउने विदेशीहरुको लागी भने मलेसिया बन्द नै रहेको जनाएको छ।
केही समयदेखि नेपाल , इण्डोनेसिया , म्यानमार , बंगलादेश लगायतका देशहरुमा मलेसियामा आप्रवासी श्रमिक तथा घरेलु कामदारका लागि खुला भएको भन्दै म्यानपावर तथा वैदेशिक रोजगार प्रदायक एजेन्टहरुले विज्ञापन गर्न थालेपछि सरकारले कसैलाई पनि भ्रममा नपर्न समेत मंत्री दातुक सेरि एम सरभाननले बताएका छन् ।
कोभिड–१९ संक्रमणका कारण १८ मार्च २०२० देखि मलेसियाले विदेशी श्रमिक भित्र्याउने नीतिलाई नियन्त्रण गरेको थियो। राष्ट्रिय सुरक्षा परिषद्, मानव संसाधन मन्त्रालय, गृह मन्त्रालय, स्वास्थ्य मन्त्रालय र अन्य सम्बन्धित मन्त्रालयसँग छलफल गरेपछि सरकारले आप्रवासी श्रमिकहरुलाई मलेसियामा प्रवेश गराउने , नगराउने वा कुन माध्यमले भित्र्याउने निर्णय लिने मंत्री दातुक सेरि एम सरभाननले बताएका छन् ।
( यो समाचारको स्रोत मलेसियाको स्थानिय संचार माध्यम एस्ट्रो अवानी तथा न्यु स्ट्रेट्स टाइम्स हो। )
