कैलाली -जिल्ला प्रहरी कार्यालय कैलालीले सशस्त्र प्रहरी बलका तीन जना गोताखोर कर्मचारीहरुलाई सम्मान स्वरुप प्रशंसा-पत्र प्रदान गरेको छ । जिल्ला प्रहरी कार्यालयमा आयोजित एक कार्यक्रममा सशस्त्र प्रहरी बल नेपाल नं. ७ बाहिनी मुख्यालय अत्तरिया, कैलालीमा कार्यरत सशस्त्र प्रहरी सहायक निरीक्षक बिरेन्द्र कार्की, सशस्त्र प्रहरी जवान हरिश भट्ट र सशस्त्र प्रहरी जवान तिलक लामालाई जिल्ला प्रहरी प्रमुख विश्व अधिकारीले सम्मान स्वरुप प्रशंसा-पत्र प्रदान गरेका थिए ।
गत भाद्र १८ गते दिउँसो कैलाली जिल्ला गोदावरी नगरपालिका वार्ड १ बस्ने १० र १४ वर्षका दुई जना बालकहरु बेपत्ता भए पछि सोहि रात ११:३० बजे समेत नदीमा पसी अथक प्रयासका साथ खोजतलास गरेर बालकहरुको शव उद्दारमा प्रदर्शन गरेको साहस, कार्य दक्षता, लगनशिलता, कर्तव्य परायणता र सहयोगको उच्च सम्मान गर्दै कदर स्वरुप प्रशंसा-पत्र प्रदान गरिएको जिल्ला प्रहरी कार्यालयले कैलालीले जनाएको छ ।
कार्यक्रममा प्रहरी उपरीक्षक विश्व अधिकारीले जिल्लामा विपद् व्यवस्थापन तथा शान्ति सुरक्षा कायम गर्नमा सशस्त्र प्रहरी बलसंगको समन्वय र सहकार्य उल्लेखनीय एवं प्रभावकारी रहेको बताउदै गर्दै गुणस्तरीय नागरिक सेवा प्रवाहका लागि यो समन्वय र सहकार्य अझै प्रभावकारी हुंदै जाने विश्वास व्यक्त गरेका थिए ।
तस्बिर : जिल्ला प्रहरी कार्यालय कैलाली
