विराटनगर – प्रदेश १ मा सामाजिक विकास मन्त्रालयले २०७६ साल असोज ८ गते गैर सरकारी संस्था करुणा फाउन्डेसन नेपालसंग गरेको सम्झौता अनुरुप समुदायमा आधारित स्वास्थ सेवामार्फत अपांगता समावेशी समाज निर्माण गर्नको लागि ” अपांगता रोकथाम तथा पुनर्स्थापना कार्यक्रम ” विराटनगरमा हाल सञ्चालन भैरहेको छ। करुणा फाउन्डेसन नेपाल , प्रदेश १ को सामाजिक विकास मन्त्रालय , विराटनगर महानगरपालिका तथा अपाङ्ग महासंघ प्रदेश न १ को संयुक्त आयोजनामा गरिएको यस कार्यक्रम विराटनगरको १९ वडामा संचालन भइरहेको छ।
यस कार्यक्रम मार्फत महानगरपालिकामा अपांगता भएका व्यक्ति, गर्भवती महिला तथा बालबालिकाहरुका साथै अपांगता भएका व्यक्तिका परिवारका सदस्यसमेत लाभान्वित हुने अपेक्षा महानगरपालिकाले राखेको छ । यस कार्यक्रम मार्फत अपाङ्ग परिचयपत्र तथा राज्यले प्रदान गरेको सेवा सुविधाबाट बन्चित अपाङ्ग व्यक्तिहरुलाई पनि ती सेवाहरुको नजिक ल्याउने विराटनगर महानगरपालिकाका सामाजिक विकास महाशाखाका प्रमुख सरोजकुमार गौतमले बताए।
आर्थिक वर्ष २०७६र७७ देखि सुरु भएको यस कार्यक्रम २०७९र८० सम्म रहनेछ। यस अवधिमा यो कार्यक्रम प्रदेशका १३७ स्थानीय तहमा विस्तार हुने बताइएको छ। विराटनगरमा पहिलो चरणको यो कार्यक्रम यहि असोज २० गते सम्म संचालन हुनेछ भने दोस्रो चरणको कार्यक्रम दशैँ पछि हुनेछ।
यस कार्यक्रमले जन्मजात तथा जन्मपछि हुने अपांगताको सम्भावना न्यूनीकरण गर्ने , मातृशिशु मृत्युदर न्यूनीकरण गर्ने तथा अपांगता भएका व्यक्ति सहितको समावेशी समाज निर्माण गर्ने लक्ष्य लिएको छ । कार्यक्रमले मातृशिशु तथा बाल स्वास्थ्य र पोषण सेवामा सबै समूहको पहुँच तथा उपभोग वृद्धि गर्ने लक्ष बोकेको छ। अपांगता भएका व्यक्ति र उनीहरुका परिवारको जीवनको गुणस्तरमा सुधार ल्याउन पनि यस कार्यक्रमले सहयोग गर्ने लक्ष राखेको छ ।
१ अर्ब ८६ करोड रुपैयाँ बजेट रहेको यस कार्यक्रमले के कस्तो परिवर्तन ल्याउने हो त्यो हेर्न बाकी छ ।
