सविन घिमिरे ,
विराटनगर -सोभित बस्नेतद्वारा निर्देशन गरिएको चलचित्र ‘डाँडाको वरपीपल’ यहि असोज २६ गते प्रदर्शन हुने क्रममा छ । शिव श्रेष्ठ , भुवन केसी , गौरी मल्ल , सलोन बस्नेत , रुबिना थापा लगायत कलाकारहरुको अभिनय रहेको यस चलचित्रको गीत ‘ देउराली बनेछ ढुंगाको ‘ असोज तीन गतेको दिन प्रिमियर गरिएको थियो । यस पश्चात यस चलचित्रको निर्देशक सोभित बस्नेत सधै झैँ विवादित बने । भनौ , उनको यो महिना वादविवादमय बन्यो । महानायक प्रकरणमा विवादित बनेकै कारण सोभित बस्नेतलाई दर्शकले यस चलचित्रमा खासै साथ नदिने छाटकाट देखिएको छ। नवराज गिरी निर्माता रहेका बुढासुब्बा डिजिटलको युट्युब च्यानलमा प्रशारण गरिएको डाँडाको वरपीपल चलचित्रको ‘ देउराली बनेछ ढुंगाको ‘ गीतमा यो सामाग्री तयार पार्दै गरेको समयसम्म लाइक भन्दा दोब्बरको संख्यामा डिसलाइक आइसकेको छ। प्रशारण भएको एक महिना वितिसक्न आट्दा पनि गीतको भ्युज तुलनात्मक रुपमा कम ( २७८,१०८ ) रहेको छ ।
दर्शकको प्रतिक्रियाको रुपमा आएको चार हजारभन्दा बढि कमेण्टहरु छन् जुन धेरैजसो सोभित बस्नेतले निम्त्याएका महानायक प्रकरण सम्बन्धित छन् । कमेण्ट मार्फत सोभित बस्नेतको महानायक सम्बन्धि तर्कप्रति दर्शकहरुले असमर्थन जनाउदै राजेश हमाल नै महानायक हुन् भन्ने तर्क राखेका छन् । कमेण्टमा उक्त गीत , चलचित्र, कलाकार , अभिनय , गुणस्तर , शुभकामना इत्यादि समबन्धि कुराहरु खासै समेटिएको छैन ।
‘ देउराली बनेछ ढुङ्गाको’ गीत पूर्वी नेपालमा सदावहार गीत जस्तै हो । स्वर्गीय खेमराज गुरुङ्ग र रिमा गुरुङ्ग होडाको स्वर तथा उत्तम लामाको शब्दमा रहेको यस गीत आफैमा नराम्रो भने होइन तर सोभित बस्नेत विवादित बनेकै कारण यस गीतले लिनुपर्ने उचाइ लिन नसक्नु एक विडम्बना हो भन्न सकिन्छ । त्यसो त सोभित बस्नेत यसरी विवादित बनेको यो पहिलो पटक भने होइन । असोज २६ मा प्रदर्शनमा आउने चलचित्र “डाडाको वरपिपल” लाई दर्शकले कत्तिको साथ दिने हुन् , हेर्न बाकी छ ।
