साफ च्याम्पियनसिप २०२१ – भारतसंग नेपाल १-० गोल अन्तरले पराजित

विराटनगर – माल्दिभ्समा जारी १३ औ संस्करणको साफ च्याम्पियनसिप फुटबल प्रतियोगितामा नेपाल भारतसंग १–० गोल अन्तरले पराजित भएको छ । भारतका लागि ८२ मिनेटमा भारतका कप्तान सुनिल क्षेत्रीले गोल गरेका थिए । नेपालको तर्फबाट भने खेलको अन्तिम समयसम्म पनि कसैले गोल गर्न नसकी नेपाल यस खेलमा पराजित भएको छ । जारी प्रतियोगितामा यो नेपालको पहिलो हार हो भने भारतको नेपालसंगको सहज जित पनि।
प्रतियोगिताको सुरुवाती दुई खेलमा जित निकालेको नेपाल आज भने पराजित भएको छ । नेपालले प्रतियोगिताको पहिलो खेलमा आयोजक माल्दिभ्सलाई हराएको थियो भने दोस्रो खेलमा श्रीलंकालाई हराएको थियो । भारतलाई भने फाइनल पुग्न अबका बाँकी दुई खेल जित्नै पर्ने दबाब थियो जसमध्ये आजको खेल भारतले जितेको छ । भारतले पहिलो खेलमा बङ्गलादेशसँग १-१ गोलको बराबरी र दोस्रो खेलमा श्रीलङ्कासँग गोलरहित बराबरी खेलेको थियो ।

यो हारपछि नेपाल ६ अंकमा नै सिमित रही अंक तालिकाको दोस्रो स्थानमा झरेको छ । माल्दिभ्स ६ अंक सहित शिर्ष स्थानमा उक्लिएको छ भने भारत ५ अंक सहित तेस्रो स्थानमा उक्लिएको छ । बंगलादेश अंक सहित चौथो स्थानमा छ । अब लिग चरणको अन्तिम दिनको खेलमा नेपालले बंगलादेश र भारतले माल्दिभ्ससंग भिड्ने छ । नेपालले बंगलादेश विरुद्ध १ अंक बटुल्न सके नेपाललाई फाइनल पुग्न पर्याप्त हुनेछ ।