काठमाडौँ – टी-२० विश्वकप अन्तर्गत आइतबार भएको खेलमा पाकिस्तानले भारतविरुद्ध जित हासिल गरेको छ । भारतविरुद्ध पाकिस्तानको यो पहिलो जित भएसंगै यो जित ऐतिहासिक भएको छ ।
दुबइमा आइतबार भएको खेलमा पाकिस्तानका लागि कप्तान बाबर अजाम र विकेट किपर मोहम्मद रिजवानले उत्कृष्ट ब्याटिङ गरे संगै सुपर १२ को खेलमा पाकिस्तानले भारतलाई १० विकेटको फराकिलो अन्तरले पराजित गरेको हो ।
भारतले दिएको १५२ रनको लक्ष्य पाकिस्तानले १७.५ ओभरमै पूरा गरेको थियो । खेलमा पाकिस्तानी कप्तान बाबरले ५२ बलमा ६ चौका र २ छक्कासहित नटआउट ६८ रन बनाएका थिए । रिजवानले ५५ बलमा ३ छक्का र ६ चौका सहित ७९ रन जोडेका थिए । भारतका लागि कप्तान विराट कोहलीले अर्धशतक प्रहार गरे र उनले ५७ रन जोडे। ओपनरद्वय केएल राहुल ३ रन र रोहित शर्मा शून्यमा आउट भएका थिए। सूर्यकुमार यादवले ११ र रिशव पन्तले ३९ रन जोडेका थिए । रिशवले ३० बल खेल्दा २ चौका र २ छक्का हिर्काए। रवीन्द्र जडेजाले १३ रन जोडे भने हार्दिक पाण्ड्या ११ रनमा आउट भएका थिए ।
बलिङमा पाकिस्तानका साहीन शाह अफ्रिदीले ३ विकेट लिएका थिए । उनले ४ ओभर बलिङ गर्दा ३० रन खर्चिए। हसन अलीले २ विकेट हात पार्दा ४४ रन खर्चिएका थिए। यस्तै शादब खान र हरिस राउफले १-१ विकेट हात पारेका थिए ।
