सविन घिमिरे ,
विराटनगर महानगरपालिका वार्ड न ६ स्थितको केसलिया मार्ग दिनानुदिन दयनिय बन्दै गएको छ । विगतका वर्षहरुमा कच्ची सडकको कारण धुलो र हिलोले हैरान बनेका स्थानीयवासीले हाल पक्की सडक त पाएको छ तर यसको संरक्षण र सरसफाइमा वडा कार्यालय , महानगरपालिका तथा स्थानियहरुले ध्यान नदिदा केसलिया रोड दिन प्रतिदिन जोखिमपूर्ण र दुर्गन्धित हुदै गएको छ । केसलिया रोड अन्तर्गत विराटनगरको धरान रोडदेखि पश्चिम रामपुरसम्मको सडकको अवस्था हेर्ने हो भने सडकपेटीमा थुपारिएको फोहोर तथा ढलको दुर्गन्धले हिडीसक्नु छैन । पैदल यात्रीहरुको सडकपेटीमा हिड्ने अधिकार खुल्लमखुल्ला हनन भएको छ । विभिन्न व्यवसाय प्रयोजनको लागि सडकपेटी हिड्ने नमिल्ने गरि अतिक्रमण गरिएको छ । सडकपेटिमै थुपारिएको फोहोरले गर्दा केसलिया रोडको सडक पेटी अतिक्रमण भएका छन् । सुनसरी जिल्लाको विभिन्न स्थानलाई जोड्ने केसलिया रोड अत्यन्तै व्यस्त हुने सडक हो । सडकपेटिको विभिन्न कारणले अतिक्रमण भएको कारण विद्यार्थी , बालबच्चा , वृद्ध, अपाङ्ग तथा अन्य नागरिकहरु सडकमा हिड्न बाध्य छन् । यसको कारण पैदलायात्रीहरुको जीवन जोखिममा परेको देखिन्छ । त्यसो त पुरै विराटनगर हेर्ने हो भने सडकपेटी अतिक्रमणलाई महानगरपालिकाले रोक्न सकिरहेको छैन । यसमा केसलिया रोडको अवस्था झनै दयनिय छ । केसलिया रोडस्थित रहेको सडकपेटीहरुको अवस्था तस्बिरमा हेर्नुहोस ।
