काठमाण्डौ — नेकपा एमालेको जारी रहेको १० औं महाधिवेशन अन्तर्गत सर्वसम्मत नेतृत्व चयनका लागि अथक प्रयास भइरहेको छ । यसको निम्ति सहमतिका लागि अध्यक्ष केपी ओली निकट नेताहरू आइतबार बिहानैदेखि छलफलमा जुटेका छन् । सहमति नभए निर्वाचन हुने भएका कारण निर्वाचनको तयारी पनि पुरा गरेर राखिएको छ ।
यतिबेला ओली समूहभित्रै सुवास नेम्वाङ, ईश्वर पोखरेल, शंखर पोखरेल लगायत नेताहरूले आ-आफ्नो पदीय आकांक्षामा अडान कायम राखेपछि सहमति जुटाउन असहज भइरहेको छ । उपाध्यक्ष भिम रावलले अध्यक्ष पदको लागि उम्मेद्वारी दिने अडानमै रहेका छन् ।
आइतबारको बन्दसत्र सुरु भएपछि अध्यक्ष केपी शर्मा ओलीले पदाधिकारी, पोलिटब्यूरो र केन्द्रीय सदस्यका नाम पेस गर्ने बताइएको छ । उनले पेश गरेको सूचिमा चित्त नबुझाउने नेताहरुलेले उम्मेदवारी दर्ता गर्नसक्ने पनि जनाइएको छ।
केन्द्रीय निर्वाचन आयोगले अध्यक्ष मण्डलबाट निर्वाचन गराउने निर्देशन आएपछि निर्वाचनको प्रक्रिया सुरु गराउने बताएको छ । यसका लागि निर्वाचनका लागि सबै तयारी पूरा रहेको पनि बताइएको छ ।
