विराटनगरका युवाहरुले लाइसेन्स व्यवस्था सहज गर्न माग गर्दै प्रदर्शन गर्ने

मोटरसाइकलको लाइसेन्सको व्यवस्था सहज गर्न माग गर्दै विराटनगरका युवाहरुले भोलि अर्थात आइतबार सडक प्रदर्शन गर्ने भएका छन्।
वर्तमान अवस्थामा मोटरसाइकल हरेक नेपालीको निम्ति नितान्त आवश्यकताको साधन भइसकेको अवस्था छ । मोटरसाइकल नेपाली नागरिकहरूको जीविकोपार्जनसँग प्रत्यक्ष जोडिएको सवाल हो । लाइसेन्स मोटरसाइकल सँगै प्रत्यक्ष जोडिएर आउने बैधानिक इजाजतपत्र हो, जुनकुरा साधन गुडाउन राज्यले अनिवार्य गरेको छ । महँगोमा सवारी साधन खरिद गरेपनि एउटा नेपालिलाइ लाइसेन्स लिन भने त्यति सहज छैन । बर्ष दिनसम्ममा एकपटक मात्र लाइसेन्स खोलिने जस्ता प्रवृत्तिले नागरिकहरू यसबाट वञ्चित भई अनावश्यक दुख र सास्ती भोग्नुको साथै बिना लाइसेन्स साधन गुडाउन बाध्य छन् । हाल अनलाइन फर्म भर्ने देखि लिएर ट्रायल, नबिकरण, स्मार्ट लाइसेन्स आदिमा पनि निकै समस्या रहेको गुनासो धेरै सेवाग्राहीहरुको छ । प्रक्रिया पुर्याएर लाइसेन्स पाउँने हरेक नेपाली नागरिकको अधिकार हो भन्ने कुरालाइ ध्यानमा राखी सम्बन्धित निकायले लाइसेन्समा रहेका समस्या समाधानको निम्ति पहल गरि, नागरिकहरुको दैनिक जीवन सहज बनाउन आवस्यक छ भन्ने उद्धेश्यका साथ विराटनगरका युवाहरुको उपस्थितिमा आइतबार साढे २ बजे ट्राफिक चोक विराटनगरमा ध्यानाकर्षण कार्यक्रम आयोजना गरिएको आयोजक विकल्प एन अल्टरनेटीभले जानकारी गराएको छ ।