विराटनगर – क्युएफएक्स सिनेमाज र रिगल सिनेमाजसँगको सहकार्यमा प्रदेश एकमा पहिलो पटक हलिउड फिल्मको विशेष स्क्रिनिङ आयोजना गरिँदै छ । १४ रिक्लाईनर सहित एउटा हलमा २१२ जना अटाउने सिट क्षमता भएको विराटनगरस्थित भाटभटेनी क्युएफएक्स मल्टीप्लेक्समा आज (शुक्रबार) एप्पल इन्टरटेनमेन्टले फिल्म ‘स्पाइडर म्यान-नो वे होम’को विशेष स्क्रिनिङ गर्न लागेको हो ।
पत्रकार सम्मेलन गर्दै वितरक कम्पनीले विशेष स्क्रिनिङका लागि सेलिब्रेटी, स्थानीय उद्योगी/व्यवसायी, चिकित्सक, विद्यार्थी, सञ्चारकर्मी र आफ्ना नियमित दर्शक सहित विभिन्न क्षेत्रका व्यक्तिहरुलाई आमन्त्रण गरेको जानकारी दिए। ठुला लगानीका मल्टिप्लेक्सहरुमा दर्शक फर्काउन ‘स्पाइडर म्यान– नो वे होम’ ले महत्त्वपूर्ण भूमिका खेल्नेमा वितरक कम्पनी विश्वस्त छन् ।नेपालभरिका फिल्म हलहरुलाई फिल्म वितरण गर्दै आएको एप्पल इन्टरटेनमेन्टले दर्शकको माग अनुसार उपत्यका र उपत्यका बाहिर फिल्म प्रोमोशन, फ्यान स्क्रिनिङ, मुभी प्रिमियर र विशेष स्क्रिनिङ लगायतका विभिन्न कार्यक्रमहरु गर्दै आइरहेको छ । यसअघी नेपाली फिल्मको मात्रै प्रिमियर तथा विशेष शो हुँदै आएको प्रदेश एकमा पनि पहिलो पटक कुनै हलिउड फिल्मको विशेष स्क्रिनिङ हुन् लागेको हो। फिल्मको विशेष स्क्रिनिङ आज (शुक्रबार) साझ ६ बजे देखी सुरु हुनेछ।
