जहदाका आन्दोलनरत शिक्षक तथा गाउँपालिकाबीच पहिलो चरणको वार्ता सम्पन्न

सविन घिमिरे / विराटनगर- आफूहरूमाथि श्रम शोषण भएको भन्दै आन्दोलन गरिरहेका मोरङको जहदा गाउँपालिकाका शिक्षकहरुसँग जहदा गाउँपालिकाले आज पहिलो चरणको वार्ता गरेको छ । गाउँपालिका तर्फबाट जहदा गा पा प्रमुख कैलाश मण्डल , प्रशासकीय प्रमुख सुवर्ण घिमिरे , शिक्षा शाखा प्रमुख दीपक खनाल तथा पीडित शिक्षक तथा कर्मचारीको तर्फबाट शिक्षक महासङ्घ पदाधिकारी घटक संस्थाका अध्यक्षहरुको उपस्थितिमा भएको वार्तामा यही २१ गते गाउँपालिकाले पीडित शिक्षक तथा कर्मचारीको माग सम्वोधन गर्दै वैठक बसी निर्णय दिने जनाएको छ भने आन्दोलनको कार्यक्रम अन्तर्गतको विद्यालय बन्द नगर्न अनुरोध पनि गरेको छ। वार्ता पश्चात गाउँपालिकाले सकरात्मक प्रतिक्रिया र माग पुरा गर्ने आश्वासन दिएको कारण २१ गतेसम्म विद्यालय बन्द नगर्ने तर गाउँपालिका अगाडि भएको धर्ना कार्यक्रम जारी राख्ने नेपाल विद्यालय कर्मचारी परिषद जहदाका अध्यक्ष मुकेश कुमार यादवले बताएका छन ।
सरकारले वृद्धि गरेको तलब जहदा गाउँपालिकाले उपलब्ध नगराएको भन्दै सो गाउँपालिकामा रहेका विद्यालयहरूमा कार्यरत बाल विकास सहयोगी तथा कर्मचारीहरु पुष १४ गतेदेखि आन्दोलनमा छन् । नेपाल शिक्षक महासङ्घ स्थानीय कार्य समिति जहदाले आयोजना गरेको आन्दोलन तथा धर्ना कार्यक्रम अन्तर्गत १९,२० र २१ गते जहदा गाउँपालिकाको सम्पूर्ण सामुदायिक तथा संस्थागत विद्यालयहरुको पठनपाठन बन्द गरेर गाउँपालिका कार्यालयमा कडा आन्दोलनमा उत्रने कार्यक्रम तय थियो।
आजको वार्ता पछि भने २१ गतेको निर्णय नआउन्जेल विद्यालय वन्द नगरी धर्ना मात्र दिने निर्णय पीडितहरुले गरेका छन् ।