धरान – आज विहान प्रदेश १ को भेडेटार-धरान सडक खण्डमा बस र ट्याम्पो जुध्दा ट्याम्पो चालकको मृत्यु भएको छ । धरानबाट भेडेटार तिर जाँदै गरेको को १ ख ४४८० नम्बरको बस र भेडेटारबाट धरान तर्फ आउँदै गरेको को २ ह ७०४१ नम्बरको ट्याम्पो आज विहान भेडेटार देखि करिब १ किलोमिटर तल एक आपसमा जुधेको थियो ।
इलाका प्रहरी कार्यालय धरानका प्रहरी निरीक्षक गजेन्द्र रायका अनुसार दुर्घटनामा परि ट्याम्पो चालक भरौल-५ सुनसरीका अन्दाजी ४०/४५ वर्षीय खड्गबहादुर कामीको घटनास्थलमा नै मृत्यु भएको छ । ट्याम्पोमा सवार ताप्लेजुङ लिखुम-२ बस्ने १५ बर्षीय उषा लिम्बु घाइते भएकी छिन । उनको स्थानीयले उद्धार गरी अस्पताल पठाएको बताइएको छ ।
बस र बस चालक धरान-१७ का ४५ वर्षीय गोविन्द बहादुर कटुवाललाई इलाका प्रहरी कार्यालय धरानले नियन्त्रणमा लिएर थप अनुसन्धान थालेको छ ।
