विराटनगर – गोलकिपिङ प्रशिक्षक विराटनगरका मनिष तिम्सिना रहेका गोकुलम केरला फुटबल क्लबले भारतीय फुटबल आई लिगको च्याम्पियन २०२१-२२को ताज पहिरिएको छ। आई लिग सिजनको फाइनल खेलमा गोकुलम केरला फुटबल क्लबले मोहमेडन एफसीलाई २–१ गोल अन्तरले पराजित गरेको थियो ।
मोहमेडनको घरेलु मैदान साल्ट लेक स्टेडियममा भएको खेलको ४९ औं मिनेटमा रिशाद पीपीले गोल गर्दै डिफेन्डिङ च्याम्पियन गोकुलम केरलालाई अग्रता दिलाएका थिए । मार्कस जोसेफको शानदार फ्रिकिकले अजहरुद्दिन मल्लिकलाई ५६ औं मिनेटमा गरेको गोलले घरेलु टोलीलाई खुसीयाली मनाउने कारण दिएको थियो।
मालाबारियन ( गोकुलम केरला फुटबल क्लबको उपनाम ) हरूको तर्फ बाट एमिल बेनीले म्यासेनबाट पास पाएपछि ६१ औं मिनेटमा गरेको पुन: गोलको कारण घरेलु फ्यानहरूको खुशी छोटो समयको लागि मात्र टिक्न सकेको थियो।
गोकुलम केरलाले अब यस महिनाको अन्त्यमा सुरु हुने एएफसी कप खेल्नेछ। उनीहरुले माजिया एफसी, माल्दिभ्स, एटीके मोहन बगान र बंगलादेशको बसुन्धरा किंग्ससँग प्रतिस्पर्धा गर्नेछन् ।
विराटनगर घर भएका मनिष तिम्सिनाले अगस्ट २०२१ देखि गोकुलम केरला फुटबल क्लबमा गोलकिपिङ प्रशिक्षण गराइरहेका छन् । यसभन्दा अघि उनी नेपालका विभिन्न एकेडेमी तथा क्लबहरुमा फुटबल प्रशिक्षकको रुपमा काम गरिसकेका छन् । उनी मोरंग जिल्ला फुटबल एशोसिएसनको हेड कोच समेत थिए ।
