काठमाडौं – काठमाडौँका दिपक भट्टराईले काठमाडौँका मेयरमा बालेन शाहले जितेको घोषणा भएपछि १ दिन निशुल्क ट्याक्सी सेवा दिने भएका छन। काठमाडौंका भट्टराईले केहि हप्ता अगाडि फेसबुक ग्रुप एमआरआरमा बालेनले मेयरमा जिते एकदिन ट्याक्सि सेवा निशुल्क उपलब्ध गराउने घोषणा गरेका थिए ।
पछिल्लो मत परिणाम अनुसार बालेनको जित सुनिश्चित भएसँगै उनले बालेनको जितको औपचारिक घोषणा भए पश्चात निशुल्क ट्याक्सी सेवा १६ गते सोमबारका दिन प्रदान गर्ने घोषणा गरेका छन । एमआरआर ट्याक्सी सेवा नामक बा २ ज ३८२७ नम्बरको उनको ट्याक्सिले दिने निशुल्क ट्याक्सी सेवाका लागि केहि सर्तहरु राख्दै भट्टराईले एमआरआरमा पोष्ट गरेका थिए।
उनले पोष्टमा लेखेका छन् ,” ट्याक्सी सेवा फ्री भन्दैमा घुम्न जानको लागि, मैयाँ भेटनको लागि , दारुपानी खानको लागि, तास खेल्न जानको लागि, दोहोरी डिस्को जानको लागि सम्पर्क नगर्नुहोला !
यो फ्री सेवा गरिब, अशक्त, अपांग, बिरामिहरुका लागि र अत्यावश्यक काममा जानेहरुको लागि लागू हुनेछ!
फ्री सेवा म जहाँ छु त्यहिबाट मात्र सुरु हुनेछ। तपाइले मेरो ट्याक्सी सडकमा दौडिरहेको देख्नुभयो र तपाइ अत्यावश्यक काममा जानुपर्नेछ अथवा तपाइसंग आर्थिक अभाव छ भने कृपया हात दिनुहोला म तपाइको गन्तव्यमा शून्य लागतमा पुर्याइदिनेछु!”
