विराटनगर – विश्व वातावरण दिवसको अवसर पारेर विराटनगरमा ” पेडल फर पिपुल एण्ड प्लानेट ” को मूल नाराका साथ साइक्लिस्ट, जलवायु अभियानता, वातावरण प्रेमी तथा युवा उद्यमीद्वारा विभिन्न कार्यक्रमहरु आयोजना गर्न लागिएको छ। आइतबार विश्व वातावरण दिवस भव्यताका साथ मनाउन दिगो विकास इन्स्टिच्युट, एन वाइ सि ए विराटनगर च्याप्टर, वन तथा वातावरण मन्त्रालय प्रदेश-१, विराटनगर महानगरपालिका तथा नेपाल वातावरण समाजको संयुक्त साझेदारीमा साइक्लिङ संगै सरसफाई, वृक्षारोपण तथा प्यानल छलफल आयोजना गर्न लागिएको हो ।
जलवायु परिवर्तनको निम्ति सचेतना गराउन र साइक्लिङका लागि साइकल लेनको आवहान गर्दै जलवायु परिवर्तनको असर केही हदसम्म निरुत्साहन गर्ने उद्देश्यले कार्यक्रम आयोजना गरिएको प्रेस मिटमा जानकारी गराइएको थियो।
कार्यक्रममा दैनिक जीवनयापनका लागि साईकल चलाउने मजदुरहरुको पनि सहभागीता रहने छ । साथै यस कार्यक्रममा मजदुरहरुलाई रेफ्लेक्टर वाला ज्याकेट पनि प्रदान गरिनेछ ।
