रौतहट| भदौ ९— रौतहटको ईशनाथ नगरपालिका–४ मठियास्थित एक भट्टी पसलमा सशस्त्र प्रहरीले छापा मार्दा ३० बोरा अवैध सुर्ती बरामद गरिएको छ।
आइतबार राति सशस्त्र प्रहरी बल नेपाल ११ नम्बर गणका गणपति एसपी सन्तोषकुमार बस्नेत र औरैया बीओपीका सहायक प्रहरी निरीक्षक खेमराज जोशीको कमाण्डमा
खटिएको टोलीले उक्त सुर्ती नियन्त्रणमा लिएको हो।
बरामद गरिएको सुर्ती तथा सुर्तीजन्य सामग्री आवश्यक कारबाहीका लागि गौर भन्सार कार्यालय बुझाइएको प्रहरीले जनाएको छ।
भन्सार छलेर ल्याइएका सामग्रीबारे थप अनुसन्धान भइरहेको छ।
स्थानीय स्तरमा बारम्बार हुने सुर्ती तथा मदिरा तस्करीका कारण यस क्षेत्रमा भन्सार राजस्वमा ह्रास हुने र गैरकानुनी कारोबार मौलाउने गरेको सुरक्षा निकायको भनाइ छ।
प्रहरीले यसलाई नियन्त्रण गर्न निगरानी अझ कडाइ गर्ने तयारी गरिरहेको बताएको छ।
