काठमाडौं, भदौ १६ — राष्ट्रिय सभा सदस्य नरबहादुर विष्टले भिजिट भिसाको नाममा करिब ४० हजार नेपाली महिलालाई कुवेत लैजाने र बेचबिखन गरिएको समाचार सार्वजनिक भएको भन्दै सरकारसँग जवाफ मागेका छन्।
सोमबारको बैठकमा उनले अध्यागमन विभागका कर्मचारीलाई प्रक्रिया सहज पार्न प्रति महिला एक लाख रुपैयाँ बुझाइएको र ती पीडितहरू हाल कुवेतमा एउटै घरमा बन्धक अवस्थामा रहेको जानकारी आएको बताए।
सांसद विष्टले सरकार र गृह मन्त्रालयसँग यसबारे भइरहेको अनुसन्धान र पीडितको सुरक्षा सुनिश्चित गर्न उठाइएका कदमबारे स्पष्ट जवाफ दिन माग गरे।
उनले मानव अधिकार र श्रम अधिकार दुवैको गम्भीर उल्लङ्घन भएको भन्दै दोषीलाई कानुनी कारबाही गर्न र पीडित महिलाको तत्काल उद्धार सुनिश्चित गर्न सरकारलाई दबाब दिए।
