काठमान्डौ , ११ जेष्ठ २०७८- काठमान्डौ उपत्यकाका तीनवटै जिल्ला प्रशासन कार्यालयको मंगलबार बसेको संयुक्त बैठकले निषेधाज्ञाको अवधि एक साता लम्ब्याएको छ । बैठकले जेठ २० गते राति १२ बजेसम्म निषेधाज्ञा लम्ब्याउँदै यो अवधिमा खाद्यान्न पसल पनि बन्द गर्ने निर्णय गरेको छ । हरियो सागसब्जीको हकमा भने बिहान ९ बजेसम्म पसल खोल्न पाइने छ ।
विकास निर्माणसँग सम्बन्धित सबै सवारी साधनलाई सञ्चालनमा रोक लगाइएको छ भने यसअघि जारी गरिएका सवारी पास खारेज गरिएको छ ।
मृत्यु संस्कार, विवाह लगायतका सवारी साधनलाई भने तोकिएका मापदण्डभित्र रहेर अनुमति दिइने बैठकले निर्णय गरेको छ । विवाहका लागि एउटा सवारी साधनमात्रै अनुमति दिइने र त्यसमा अधिकतम ७ जनालाई मात्र यात्र अनुमति दिइने छ ।
निषेधाज्ञा उल्लंघन गरेको पाइए उल्लंघन गर्नेलाई कैद र जरिवानासमेत गर्ने गरी आदेश जारी गरिएको छ ।
