धरान – यहि माघ २९ गते राष्ट्रिय तथा अन्तराष्ट्रिय प्याराग्लाईङ्ग खेलाडी तथा प्रशिक्षक देशवीर जिमीलाई मरणासन्न हुने गरि कुटपिट भएको घटनाको विषयमा पिडित जिमीका परिवार र एक्स्ट्रिम धरानले इलाका प्रहरी कार्यालय धरान मा गइ ध्यानाकर्षण गराएका छन् । घटना भएको ११ दिनसम्म पनि मुख्य आरोपी भुपाल चाम्लिङ्ग राई पक्राउ पर्न नसकेको भन्दै पिडित जिमीका परिवारको तर्फबाट फुपु , दुइ बहिनि , भाइहरु लगायत एक्स्ट्रिम धरानका सदस्यहरुले प्रहरी नायव उपरीक्षक नरेन्द्र कुँवरलाई भेटि ध्यानाकर्षण गराएका हुन् । उनीहरुले प्रहरी नायव उपरीक्षक सामु दोषीलाई छिटोभन्दा छिटो कानुनको दायरामा ल्याई कारवाही गर्नु पर्ने माग राखेका थिए। सो क्रममा घटनाको अनुसन्धान तथा फरार आरोपीको खोजि कार्य भइरहेको कुँवरले बताएका छन् । घटनास्थलबाट नै यस घटनामा संग्लग्न भनिएको २ जनालाई पक्राउ गरिएको र म्याद थप गरी हिरासतमा रहेको जानकारी दिदै कुनै दवावमा नपरी मुख्य आरोपीलाई पनि चाडो पक्राउ गरिने आश्वासन कुँवरले परिवारलाई दिएका छन् । त्यस्तै बुधबार धरान उप महानगरपालिकाका मेयर तिलक राईलाई भेटि यस घटना सम्बन्धि ध्यानाकर्षण गराई धरानमा गुण्डागर्दी बढीरहेको जानकारी दिने पिडित देशाविर जिमीले जानकारी दिएका छन् ।
यस कुटपिटको घटनामा संग्लग्न अन्य २ जनालाई घटना भएकै दिन प्रहरीले पक्राउ गरेपनि पिडितले प्रहरीमा दिएको उजुरीका मुख्य आरोपीलाई भने प्रहरीले फेला पारी पक्राउ गर्न सकेको छैन । पिडित देशविर जिमीले कुटपिटमा संग्लग्न ३ जनाको विरुद्धमा ज्यान मार्ने कसुरमा फागुण १ गते इलाका प्रहरी कार्यालयमा उजुरी दर्ता गराएका थिए ।
प्याराग्लाइडिङ्ग सुरक्षाको विषयलाई जोड्दै आरोपी भुपाल चाम्लिङ्ग राई संचालक रहेको धरान स्काई एडभेन्चर प्यारग्लाडिङ्ग प्रालिले गरिरहको खेलहरुको सन्दर्भमा भएको अनियमितताको विषयमा कुरा उठाउदा आफुले कुटाइ खाएको पिडित देशविर जिमीले बताउदै आएका छन् ।
धरान १६ स्थित रहेको स्टेडियम अगाडि छलफल भइरहेको समयमा भुपाल राई , कृष्ण राइ र विजय राई लगायतले देशवीर जिमीमाथी ढुंगा, इट्टा जस्ता वस्तुले अन्धाधुन्द प्रहार गरी वेहोस बनाएका थिए । प्रहरीको सहयोगमा उनलाई उद्धार गरी धरान स्थित विपी कोइराला स्वास्थ्य तथा विज्ञान प्रतिष्ठानमा सघन कक्षमा तुरुन्त उपचार गरेपछि उनी बाचेका थिए । कुटपिटमा परी पुर्वाञ्चलका पहिलो प्याराग्लाइडिङ्ग पाइलट तारामणि राई पनि घाइते भएका थिए।
त्यस्तै सो घटना भएको बेला घटनास्थलमा उपस्थित रहेका धरान वार्ड न १ का अध्यक्ष तथा मुख्य आरोपी भुपाल चाम्लिङ्ग राईका व्यवसाय पार्टनर रोशन अधिकारीले उनीहरुलाई आफुले झगडा गर्न लगाएको होइन भन्दै यस कुरामा आफु निर्दोष रहेको बताएका छन् । कुटपिटमा संग्लग्न भुपाल राई र पिडित देशवीर जिमीबीच आफुहरुले सन्चालन गरेको धरान स्काई एडभेन्चर प्यारग्लाडिङ्गको विषयमा पहिला देखि कुरा हुदै आएको र सो दिन पनि यस्तै विषयमा अनौपचारिक छलफल हुदा भुपाल राई र उनका भाईहरुले कुटपिट गरेको बताएका छन् । केहि कुराहरुबिच विवादले चरम रुप लिदा कानुनी उपचारमा जानु पर्ने तर त्यहा कुटपिट भएको घटनाप्रति आफुलाइ पनि नराम्रो लागेको उनले बताए । अधिकारीले धरान स्काई एडभेन्चर प्यारग्लाडिङ्ग प्रा लि व्यक्तिगत व्यवसाय भएपनि यसको संचालन तथा यहाबाट उडान हुने प्याराग्लाडिङ्गको विषयमा पिडित तथा प्याराग्लाइडिङ्ग प्रशिक्षक देशवीर जिमीले विभिन्न कुराहरु गरिरहेको आरोप लगाएका छन् । सो दिन पनि यस्तै कुरा हुदा घटना भएको उनले बताए ।
यता निर्घात कुटपिटको शिकार बनेका प्याराग्लाइडिङ्ग प्रशिक्षक देशवीर जिमीले आफु नेपालमा रहेका प्याराग्लाइडिङ्ग व्यवसायहरुलाई दिईने लाइसेन्सको लागि अनुगमन गर्ने प्रशिक्षक मध्येको एक प्रशिक्षक तथा नेपाल उड्ड्ययन प्राधिकरण नेपाल हवाई खेलकुद संस्थाद्वारा जारी गर्ने लाइसेन्स विभागमा प्राविधिज्ञ भएको कारण देशभर संचालन हुने प्याराग्लाइडिङ्ग उडान तथा खेलको अनुगमन गरेर त्यस सम्बन्धि सल्लाहसुझाव दिनु आफ्नो कर्तव्य रहेको भन्दै यस कुराको खण्डन गरेका छन् । उनले पहिला देखि नै त्यहामात्र नभएर देशका विभिन्न स्थानमा प्याराग्लाइडिङ्ग उडानको सुरक्षाको विषयमा कुरा उठाउदै आएको बताएका छन् । प्याराग्लाइडिङ्गमा पाइलट तथा खेलाडिको मात्र नभएर स्वदेशी तथा विदेशी पर्यटकहरुको सुरक्षा पनि जोडिएकोले एक प्रशिक्षकको नाताले कुटपिटमा संग्लग्न आफ्नो विद्यार्थी तथा प्याराग्लाडिङ्ग व्यवसायमाथि आफ्नो चासो हुनु स्वाभाविक रहेको उनले बताए । मुख्य आरोपी भुपाल चाम्लिङ्ग राईले संचालन गरेको धरान स्काई एड्भेञ्चरले प्याराग्लाइडिङ्ग उडानको समयमा लाइसेन्स प्राप्त नगरेका पाइलटहरुबाट उडान गराई पर्यटकको ज्यान जोखिममा पारेको कुराहरु आफुले उठाउदै आएको पिडित जिमीले बताए ।
आफ्नो विद्यार्थी तथा सोलो पाइलट विजय चाम्लिङ्ग राई सहित भुपाल चाम्लिङ्ग र कृष्ण राइसंग धरान १ का अध्यक्ष रोशन अधिकारीकै उपस्थितिमा सामान्य छलफलको भइरहदा ३ जनाले विभिन्न वस्तुले आफुलाई हत्या गर्ने उद्धेश्यले गुण्डागर्दी शैलीमा गरेको यो आक्रमणले समाज असुरक्षित रहेको संदेश दिएको कारण अन्य नागरिकले सुरक्षाको महसुस गर्नको लागि पनि आफुहरुजस्तो पिडितले न्याय पाउनु पर्ने जिकिर उनले गरेका छन् । यस घटनामा संग्लग्नहरुले कानुन बमोजिम कारवाही भोग्नु पर्ने तथा भुपाल राईको सम्पूर्ण प्याराग्लाइईङ्ग सम्बन्धित पद र लाइसेन्स खारेज हुनु पर्ने माग राखेका छन् ।
यस घटनालाई लिएर विभिन्न पर्यटन तथा साहसिक खेलमा संग्लग्न संस्था, व्यवसायी , पाइलट तथा शुभचिन्तकहरुले निन्दा गरेका छन्। दोषीलाई कारवाही हुनुपर्ने माग तथा दवाव उनीहरुले दीइरहेका छन् ।
को हुन् कुटपिट गर्ने समूह ?
यस घटनामा संग्लग्न मुख्य आरोपी भुपाल चाम्लिङ्ग राई नेपाल हेण्ड्ग्लाइडिङ्ग एण्ड प्याराग्लाइडिङ्ग संघ प्रदेश १ का अध्यक्ष ,होटल हंगकंग धरानका संचालक तथा धरानमा संचालित रहेको धरान स्काई एडभेन्चर प्यारग्लाडिङ्ग प्रा लि का शेयर होल्डर पनि हुन् । अर्का पक्राउ परेका आरोपी विजय राई भुपाल चाम्लिङ्ग राईका भाइ हुन् भने पिडित देशवीर जिमीका प्याराग्लाइडिङ्ग विद्यार्थी र सोलो पाइलट पनि हुन् । त्यस्तै पक्राउ परेका अर्का अभियुक्त कृष्ण राई उनीहरुकै व्यवसायिक पार्टनर हुन्।
को हुन् देशवीर जिमी ?
देशवीर जिमी बिगत ११ बर्ष देखि अनवरत रुपमा राष्ट्रिय र अन्तराष्ट्रिय खेलाडिको रुपमा साहसिक खेल प्याराग्लाईडिङ उडाउँदै आएका प्यारग्लाइडिङ्ग प्रशिक्षक पनि हुन् । उनी नेपाल हेण्ड ग्यारालाईडिङ्ग एण्ड प्याराग्लाईडिङ्ग संघको केन्द्रिय प्रशिक्षक तथा नेपाली सेनाको प्रशिक्षक समेत रहेका छन्। रास्ट्रीय तथा अन्तराष्ट्रिय रुपमा १५ वटा प्याराग्लाइडीङ्ग खेलमा सहभागी जनाइसकेका उनले नेपालको प्रतिनिधित्व गर्दै प्याराग्लाइडिङ्ग प्रि वर्ल्डकपमा पनि सहभागी जनाएका थिए । प्रदेश १ बाट एसियन कप तथा विश्व कपमा सहभागी जनाउने उनी एकमात्र प्याराग्लाईडिङ्ग खेलाडी हुन्। नेपालमा रहेका प्याराग्लाइडिङ्ग व्यवसायहरुलाई दिईने लाइसेन्सको लागि अनुगमन गर्ने प्रशिक्षक मध्येको एक प्रशिक्षक जिमी नेपाल उड्ड्ययन प्राधिकरण नेपाल हवाई खेलकुद संस्थाद्वारा जारी गर्ने लाइसेन्स विभागमा प्राविधिज्ञको रुपमा कार्यरत छन् ।
पोखरामा सम्पन्न आठौ राष्ट्रिय खेलकुदमा प्याराग्लाइडिङ्ग विधा तर्फ प्रदेश १ को कप्तान रहेका उनले त्यो बेला प्रदेश १ लाइ दोस्रो स्थान हासिल गराएका थिए । सन् २०१६ मा इण्डोनेसियामा आयोजना भएको प्याराग्लाइडिङ्ग प्रि वर्ल्डकपमा उनी पनि नेपाललाई प्रतिनिधित्व गर्ने एक प्याराग्लाइडिङ्ग खेलाडी हुन्। त्यस बेला नेपालले प्रथम स्थान हासिल गरेको थियो । त्यस्तै स्याङ्गजामा सम्पन्न भएको प्याराग्लाइडिङ्ग वर्ल्ड कपमा पनि उनले सहभागी जनाएका थिए । पर्यटन प्रवर्धनको लागि विभिन्न अभियानमा अग्रसर रहेका उनले देशभर उडान गरिने तथा खेलिने प्यराग्लाइडिङ्गको अवलोकन तथा अनुगमन गरी त्यस सम्बन्धि सुझाव तथा प्रतिक्रिया दिदै आएका छन् ।