१९ असोज, काठमाडौं । दुई दिनदेखि लगातार परेको अविरल वर्षापछि भैरहवा आसपासमा अलपत्र परेका यात्रुहरूलाई चार्टर विमानमार्फत काठमाडौं ल्याइने भएको छ।
जिल्ला प्रशासन कार्यालय रुपन्देहीले आज (आइतबार) राति ९ बजे काठमाडौं पुग्नैपर्ने यात्रुहरूलाई नेपाल एयरलाइन्सको चार्टर विमानमार्फत ल्याउने तयारी गरेको हो।
रुपन्देहीका प्रमुख जिल्ला अधिकारी (सीडीओ) टोकराज पाण्डेका अनुसार विशेषगरी वैदेशिक रोजगारीका लागि विदेश जानुपर्ने र स्वास्थ्य उपचारका क्रममा अलपत्र परेका यात्रुहरूलाई प्राथमिकताका साथ काठमाडौं पठाइनेछ।
‘अविरल वर्षाका कारण सडक अवरुद्ध भएका कारण आकस्मिक रूपमा काठमाडौं पुग्नुपर्नेहरूलाई चार्टर विमानमार्फत पठाउने निर्णय गरिएको हो,’ सीडीओ पाण्डेले अनलाइनखबरसँग बताए।
उनका अनुसार, नेपाल एयरलाइन्सको विमानमार्फत १ सय ५८ जना यात्रुहरूलाई काठमाडौं ल्याइनेछ। यात्रुहरूले भैरहवा विमानस्थलमा रहेको नेपाल एयरलाइन्सको काउन्टरमा गएर आफ्नो अवस्था र आवश्यकता जानकारी गराउन सक्नेछन्।
यात्रा र टिकटका विषयमा सम्पर्क गर्न नेपाल एयरलाइन्स, भैरहवाका कर्मचारी अरुण पन्थी (९८५७०२३६७१) सँग सम्पर्क गर्न प्रशासनले आग्रह गरेको छ।
नेपाल एयरलाइन्सको विमान आज साँझ ७ बजे काठमाडौंबाट भैरहवा पुग्ने र सोही विमानमा यात्रुहरू लिएर फर्किने तयारी रहेको प्रशासनले जनाएको छ।
