पूर्वसभामुख कृष्णबहादुर महरा आज आइतबार सीआईबी (केन्द्रीय अनुसन्धान ब्युरो) द्वारा पक्राउ परेका छन्। महरामाथि २०७९ पुस १० गते फ्लाई दुबईको उडानमार्फत नेपाल भित्र्याइएको ८ करोड ५५ लाख रुपैयाँ बराबरको सुन तस्करी प्रकरणमा संलग्नतारहेको आरोप छ।
उक्त सुन चिनियाँ नागरिक लि हानसोङ द्वारा ल्याइएका दुई सुटकेसभित्र ७३० वटा भेप (vape) को रूपमा लुकाइएको थियो। विमानस्थल भन्सारका नासु रेवन्त खड्का लगायतका कर्मचारीको मिलेमतोमा भेप साटेर सुन निकालिएको प्रमाण खुलेको छ।
अनुसन्धानका क्रममा महराले सुन छुटाउन भन्सारमा दबाब दिएको प्रमाण फेला परेको बताइएको छ। यसै प्रकरणमा उनका छोरा राहुल महरा पहिले नै पक्राउ परि जेल चलान भइसकेका छन्।
सीआईबीले कल रेकर्ड र बयानका आधारमा महरा र उनका छोराको चिनियाँ नागरिकहरूसँग निरन्तर सम्पर्क र सहयोग रहेको देखाएको छ।
यो प्रकरणमा यसअघि दुई पटक अभियोजन भइसकेको र महराको यो तेस्रो अभियोजन (supplementary charge) हुने जनाएको छ।
यसअघि पनि सत्ता र शक्तिको प्रभावका कारण महराविरुद्धको अनुसन्धान रोकिएको बताइएको थियो।
